Comunu de Pramantellu Ofìtziu de sa Lìngua Sarda

:: Gastronomia

 

Sa coxina sarda est simpri e saboria, sintzilla, e arrica de cosa de cassa, de pisci, de  porcus arestis, e de casu.

 

 

Pani e pasta

Su connotu gastronòmicu sardu est simpri e austeru, tenit gustus, saboris e fragus su prus de is bortas nous po chi benit de terramanna, comenti  funt is nòminis de is pitantzas.

Su cocoi, cotzula, carasau, chibarzu, civraxu, modditzosu, pillonca, tundus, pani de sceti, pani de sìmbula, tantu po ndi nai calincunu.

Funt totus nòminis chi funt stètius donaus a panis o fogatzas in medas logus de s’isula a segunda de su tipu de farra, froma o coidura.

Is fromas funt de duas spètzias: cussas mannas meda chi arribant a prus chilus e cussas mediu-piticas.

Su carasau fini fini (su pani de is pastoris, chi si mantenit in su tempu) chi est stètiu torrau a batiai  de is stràngius cun su nomini de “carta di musica” paperi de mùsica; issu est fatu cun sìmbula de trigu tostau, fromentu e sali.

Cun su pani carasau si preparat su pani fratau famau, una supa bona meda, anca si ponint impari calincunu ou, tamata e casu.

Spainendì ollu ermannu, sali e unu pagu de pìbiri a su carasau, e callentendi in su forru, si otenit su pani guttiau.

Sa pasta puru comenti su pani, at pigau meda importàntzia in su sustentamentu de su populu sardu.

Su pratu forti de is sardu funt is malloreddus, chi funt malloreddus de sìmbula cun s’aciunta de unu spìtzulu de tzaferanu sardu.

Una pasta bona meda est sa frègula, sìmbula grussa de fromentu tostau, chi est stètia tramudada cun arti in bocixeddas piticas tostadas.

Intru de is pastas sardas pigant unu logu importanti is culurgionis, de arrescotu e edas, o casu friscu, fatus in is maneras prus diversas siat po su bariai de su prenimentu chi de sa froma.

Una bariedadi ollastina meda importanti si fait cun prenimentu de patatas e “cas’e fitta” (casu friscu de craba) e sa cosidura a “cabitza-spiga” de su culurgioni.

Arregordaus po importàntzia de agradessimentu is ferritus puru chi est una pasta sìmbili a cussa calabrese, est a nai tallarinus chi benint atrotiaus a ingiriu de unu ferru de mìgia, allonghiendu-sì, sa pasta pigat sa forma a spirale.

Totu custas pastas funt sempri cundias con bànnias meda arricas de petza de porcu o de angioni, ollu ermannu, allu, tamatas friscas e arrogheddus acabadas cun casu sardu

Po acabai atras duas spetzialidadis nomenadas de sa coxina tìpica sarda funt is panadas (duas pillus de pasta circolari postas asuba e pari e serradas a is orus cun aintru unu prenimentu chi podit essi de petza, anguidda o birdura) e il cascà (in arbau cuscus).

 

 

IS DURCIS

S’arti durciària in Sardìnnia fut una cosa, sighendi su connotu, giai giai sceti po is fèminas; oi s’arta calidadi chi ndi est sighia at donau vida a una produsidura manna artisanali.

Bonus meda, cun ingredientis naturalis e sintizillus, is durcis sardus s’aprontant innanti de totu cun prodùsius de sa laurera comenti meli, mèndulas, nuxis, ous, casu, lati, farra, fruta, saba (mustu cotu) e aromis naruralis.

Is drucis sardus funt de bariedadis meda, chi no ddus podeus allistai totus.

Spissu pigant nòminis diversus a segunda de su logu innoi benint prodùsius.

Intru de is drucis, amentaus is pirichitus, lèbius meda e apena tzacarrinus, fatus cun farra, ous, tzùcuru, limoni, is bianchitus, una spètzia de meringa fata cun su arbu de s’ou montau a nii cun s’aciunta de tzùcuru e trisinau de mèndulas drucis.

Is amaretus famaus s’aprontant comenti is amaretus tìpicus italianus; funt perou prus modditzus e tenint unu gustu prus fini e delicau.

Benint aprontaus cun mèndulas drucis postas impari cun cussas  marigosas, tzùcuru e ous.

Intru de is spetzilidadis tìpicas prus circadas agataus puru is pàrdulas o casadinas, fatas de unu arrogheddeddu de pasta, prena de prenimentu moddi de arrescotu o de casu friscu, ous, tzucuru e farra, cun d-una aciunta pitica de tzaferanu de Sardìnnia  chi ddi donat unu fragu forti e una coloratzioni groghixedda.

Meda bonus puru is candelaus, drucixeddus de pasta de mèndula, tzùcuru e àcua de frori de aràngiu; is suspirus de Otzieri; is guefus; is durcixeddus de Oliana; is pistocus de Serrenti; is cocois de saba; su gatou; is sebadas famadas, durcis de pasta a pillu prenus de casu friscu; is mustatzolus.

Aintru de is festas fatas in s’ìsula no podit mancai su turroni de Tonara e de Dèsulu aprontau cun nuxedda, nuxi, arbe de ou, mèndulas, meli e cobertu de una òstia lèbia meda.

 

 

Meli

Po s’arrichesa de froris de meli, po su clima bonu meda, po sa mancàntzia de faidoris de imbrutamentu, sa Sardìnnia podit essi cunsiderada sa prus arregioni de Itàlia importanti po sa produsidura de su meli de balori.

Su meli sardu tenit fragus, saboris, componentis nurdiosus no comunus, chi benint innantis de totu de is spètzias frorealis endèmicas, ùnigas in su mundu.

Su murdegu, s’olioni, su cardu molenti, sa feurra, sa teria, su tzìpiri funt sceti calincuna de is essèntzias  chi, cun su limpiai insoru, cuncurrint a artziai is caraterìsticas organolèticas de su meli sardu.

Su spàciu de custu produsiu in s’ìsula est artu meda poita ca su meli spissu meda est unu componenti importanti de medas spetzialidadis druciàrias.

 

 

Su binu Sardu

Candu si chistionat de laurera de bìngia in Sardìnnia, tocat a primu de totu a ponni in craru sa bariedadi stravanada de arratzas de àxina chi nci funt in is manixus de s’ìsula, chi in is ùrtimus dexannus ant permìtiu de produsi una oferta enològica arrica meda.

Su de tenni una diversidadi diaci manna est dèpia a is caraterìsticas morfològicas de s’ìsula chi formant medas ambientis naturalis cun micro-climas chi meda bortas càmbiant in su spàtziu de pagus dexenas de chilometrus.

Custu est dèpiu a unu territòriu prenu de montis e cùcurus, geologicamenti diferentis, e una positzioni diciosa meda.