Comunu de Pramantellu Ofìtziu de sa Lìngua Sarda

:: Arretzetas

 

Sa Sardìnnia est unu logu chi est stètiu bonu a abalantai su connotu suu in su papai puru.

Una naturalesa aresti e su comenti est fata s’ìsula s’ant permìtiu de papai in dii de oi puru is cosas prus tìpicas.

Simpri e sintzilla, che is sardus, sa cosa de papai sarda ndi benit prus chi totu de is traballus prus de importu de Sardìnnia, su pastori e su massaju e, de calincunu sèculu a oi, de sa cosa de mari puru.

Po custas arritzetas, serbint ingredientis chi fait a agatai in dònnia logu e in prus, su prus de is bortas, funt a stracu baratu puru.

 

Sa Burrida:

Sa burrida est una pitantza antiga meda chi fait parti de sa coxina de su connotu populari casteddaju.

Sa burrida est una manera de coxinai su gatu de mari, una genia de scualu piticu chi tenit sa peddi tostada e arrespinosa; candu est matucheddu custu pisci est longu prus o mancu mesu metru.

Su gatu de mari est traballosu a ddu scroxai, duncas candu andaus a ddu comporai cumbenit a ddu pigai giai scroxau.

Sa burrida, chi nant chi siat de bennidura Sciardana o Fenìcia, est forsis s’ùnigu manera po ddu fait bonu diaderus.

Su chi serbit:

  • 1 chillu de gatu de mari
  • 1 decìlitru de ollu ermanu
  • 100 gramus de cibudda bianca
  • 1 o 2  tìtulas de allu
  • 50 gramus de papu de nuxi
  • mesu litru de axedu biancu o arrubieddu
  • sali

 

Aprontai sa pitantza

-Po primu cosa tocat a aminudai sa cibudda, su figau de su gatu de mari, sa nuxi, s’allu.

-Faeus arrubiai sa cibudda in s’ollu callenti, aciungeus su figau de su gatu de mari, lassaus coi po duus minudus, e a s’acabu aciungeus s’axedu, sa nuxi e s’allu. Lassaus coi po àterus cincu minudus a fogu bàsciu, e a s’acabu sa bànnia est aprontada.

- Su gatu de mari bolit segau a tancheddus: dònnia tancheddu depit essi longu prus o mancu cincu centìmetrus e is tancheddus a sa parti de sa conca bolint sperraus ca asinuncas funt tropu grussus. Poneus is tancheddus a coi in d-una pingiada cun àcua salia buddendi. Candu s’àcua torrat a buddiri, e sa prupa de su pisci mudat colori, ndi studaus su fogu, ndi bogaus su pisci de s’àcua e ddu poneus a sfridai.

- Una borta sfridau, poneus is tancheddus in d-unu tianu , aciungeus sa bànnia callenti e ddu tupaus cun d-unu crobetori.

- Lassaus pasiai sa burrida po 24 oras in logu friscu e chena de dda murigai.

Sa burrida bolit papada frida, a temperadura de ambienti, e podit essi stugiada po unas cantu de diis.

 

Su pisci a scabèciu

Su pisci a scabèciu est un’arritzeta chi est nàscia in s’antigu po arrenesci a allogai su pisci po unas cantu de diis.

Su pisci a scabèciu àteru no est chi pisci fritu cundiu cun d-una bànnia fata cun ollu, cibudda, allu, perdusèmini, axedu e sali.

In s’antigu faiant a scabèciu su pisci fritu abarrau o su pisci de allogai po s’incrasi, ma imoi chi teneus su frigorìferu in domu custa arritzeta dda feus sceti ca est bona e saboria.

Po fai su scabèciu is calidadis mellus de pisci funt: sarrànnia, vaca, pisci-urrei, pagellu, boga e àteru pisci bonu po friri.

Su chi serbit po s’arritzeta (po ses personis):

  • 1 chillu e mesu de pisci po friri
  • ollu po friri
  • 1 decìlitru de ollu ermanu
  • 1 cibudda
  • 2 tìtulas de allu
  • unus cantu de follas de perdusèmini
  • pani tratau o sìmbula fini
  • ¼  de axedu biancu
  • sali

Aprontai sa pitantza:

- Smatzaus su pisci, ddu limpiaus de sa scata e ddu sciacuaus. Una borta sciutau, ddu depeus insimbulai.

Ddu  poneus a friri in d-una sartània cun ollu callenti.

Una borta fritu, ddu feus stiddiai beni de s’ollu e ddu poneus a sfridai in d-unu tianu de còssiu.

- Po aprontai sa bànnia poneus a callentai s’ollu de olia in d-unu tianu e nci ghetaus sa cibudda segada a fitixeddas. Candu sa cibudda s’est imbrunada, aciungeus s’allu e su perdusèmini trisinaus, e unu pagu de sali.

Candu s’allu s’est imbrundau aciungeus s’axedu e ddu lassaus buddiri fintzas a ddu fai callai unu pagu.

Acabada de coi sa bànnia, nci dda ghetaus in su tianu anca nci eus postu su pisci fritu.

Feus scabeciai su pisci ponendi su tianu in logu friscu. Sa cosa mellus est a ddu lassai scabeciai po 24 oras a primu de papai.

 

Malloreddus a sa campidanesa

Is malloreddus a sa campidanesa funt una de is prus connotas pitantzas de sa coxina sarda.

Su fueddu “malloreddu” nant chi ndi benit de su latinu “mallolus” chi bolit nai “tancheddu de pasta”.

Su chi serbit po s’arretzeta (po ses personis):

  • 500 gramus de malloreddus (sardus!)
  • 300 gramus de sartitzu friscu cundiu cun sa matafalua
  • 1 decìlitru de ollu ermanu
  • 2 tìtulas de allu
  • 1 chillu/1chillu e mesu de tomata po bànnia
  • calincunu filixeddu de tzafaranu
  • 3 follas de afàbica
  • sali
  • 120 gramus de casu de brebei

Aprontai sa pitantza:

- Aminudaus sa tomata. Segaus su sartitzu a tancheddus e ddu feus arrubiai in s’ollu callenti fintzas a candu est cotu.

Bogaus su sartitzu de su tianu, e in s’ollu de su sartitzu e totu coeus is titulas de allu fintzas a ddas fai imbrundai.

Bogaus s’allu, poneus a coi sa tomata e aciungeus unu cucirinu de sali. Candu sa bànnia est pronta aciungeus s’afàbica, su tzaferanu e su sartitzu, e murigaus beni de manera de amesturai totu is saboris.

- Poneus is malloreddus a coi in d-una pingiada cun àcua salia buddendi. Acabaus de coi e bogaus de s’àcua, ddus poneus in d-una supera de còssiu impari a sa bànnia.

- Candu poneus is malloreddus in is pratus, a donniunu dd’aciungeus calincunu arrogheddu de sartitzu e unu pagheddu de casu tratau.

 

Conillu a suchitu

Su chi serbit po s’arretzeta (po ses personis):

  • 1 conillu de unu chillu
  • 1 decìlitru de ollu de olia
  • 2 cuceronis de brodu
  • 1 cibudda
  • 2 tìtulas de allu
  • unus cantu de follas de perdusèmini
  • 1 arrempixeddu de tzìpiri
  • 1 tassa de crannatza
  • sali

Aprontai po sa pitantza:

Sciacuaus su conillu, ddu faeus stiddiai, ddu asciutaus e ddu segaus a tancheddus. Poneus a callentai s’ollu de olia in d-unu tianu e poneus su conillu a friri fintzas a ddu fai indorai.

Aciungeus sa cibudda segada a fitixeddas, s’allu, su perdusèmini e su tzìpiri trisinaus a fini. Comenti s’imbrundat s’allu, poneus su binu, artziaus su fogu e tupaus su tianu cun d-unu crobetori. Poneus unu pagu de sali e fatu fatu ddi aciungeus unu tzicheddu de brodu.

Ddu serbeus callenti e ddu acumpangiaus cun d-unu binu nieddu bonu.

 

Canciofa cun patata

Su chi serbit  po s’arretzeta (po ses personis):

  • 6 canciofas de calidadi spinosa
  • 500 gramus de patata
  • 1 cibudda
  • 1 tìtula de allu
  • perdusèmini
  • ollu de olia
  • sali

Aprontaus sa pitantza:

- Limpiaus is concas de canciofa boghendi-ndi is follas tostadas chi s’agatant a ingiru, ndi ddi segaus sa parti spinosa e su cambu, sperraus dònnia conca in 8 fitixeddas.

- Poneus a imbrundai una cibudda trisinada in d-unu tianu cun ollu callenti e a pustis aciungeus sa canciofa, sa patata scroxada e segada a dadixeddus, sali a prexeri, allu e perdusèmini trisinaus.

Chi su cambu de sa canciofa est bonu limpiaus cussu puru, ddu segaus a tancheddeddus e ddu poneus a coi impari a totu s’àteru.

- Lassaus a coi a fogu bàsciu ponendi su crobetori in su tianu e chi serbit, aciungendi fatu fatu unu tzicheddu de àcua o de brodu callenti.

Custa pitantza dda serbeus callenti

 

Fai a schiscionera

Su chi serbit po s’arretzeta (po ses personis):

  • 1 chillu de faixedda
  • 200 gramus de cibudda frisca
  • 300 gramus de lardu
  • 200 gramus de sartitzu stasonau
  • 2 tìtulas de allu
  • unus cantu de follas de perdusèmini
  • unus cantu de follas de amenta ( po chini dda bolit ponni)
  • sali

Aprontai sa pitantza:

- In d-una sartània manna e arta faeus arrubiai sa cibudda e s’amenta aminudadas impari a su lardu segau a fitixeddas.

Aciungeus sa faixedda impari a unu cuceroni de àcua salia callenti.

Candu sa faixedda est casi cota, aciungeus calincun’àtera fitixedda de lardu, su sartitzu segau a arrogeddus, s’allu e su perdusèmini trisinaus.

- Lassaus  acabai de coi sa faixedda e dda serbeus callenti.

 

Angioneddu a cassola

S’angionededdu a cassola est una de is tantis maneras de coi s’angionededdu de lati in Sardìnnia.

Su chi serbit po s’arretzeta (po ses personis):

  • 1 chillu de prupa de angioni
  • 3 tìtulas de allu
  • unus cantu de follas de perdusèmini
  • su suci de unu limoni
  • 1 decilitru de ollu ermanu
  • 2 cuceronis de brodu
  • sali

Aprontai sa pitantza:

- Segaus sa prupa de s’angioni a dadus. Poneus s’ollu in d-unu tianu e ddu faeus callentai, a pustis poneus sa petza, su perdusèmini trisinau e s’allu chi depit essi unu pagu strecau.

- Poneus su sali chi abisòngiat e fatu fatu, chi sa petza est coendi, poneus unu pagu de brodu, mellus chi siat brodu de angioni e totu.

- Candu sa petza est acanta de essi cota, ndi bogaus is tìtulas de allu e poneus su suci de su limoni. Artziaus su fogu e murigaus sa petza fintzas a fai callai sa bànnia.

Serbeus sa petza callenti.

 

Su matzamurru

Su matzamurru est forsis sa prus arritzeta pòbora chi nci teneus in Sardìnnia.

In Casteddu, de s’ùrtimu gherra finsas a is annus de ‘50/’60, fiat s’ùnigu manera po sa genti de arrenesci a papai calincuna cosa o po acabai su pani abarrau.

Su matzamurru est una supa fata cun bànnia de tomata e pani tostau.

Custa arritzeta chi ligeis asuta est una bariedadi “arrica”.

Su chi serbit po s’arretzeta (po ses personis):

  • 1 chillu de pani tostau (modditzosu, civraxu o àteru pani sardu)
  • 1mesu litru de lati
  • 500 gramus de tomata frisca
  • 2 tìtulas de allu
  • unus cantu de follas de perdusèmini
  • 1 cibudda
  • 2 follas de àfabica
  • ollu ermanu
  • 1 tomata sicada
  • 150 gramus de casu de brebei

Aprontai sa pitantza:

- In d-unu tianu poneus a callentai unu pagu de ollu ermanu, nci ghetaus sa cibudda, s’allu, e su perdusèmini trisinaus e ddus feus imbrundai.

A pustis aciungeus sa tomata aminudada, chena de sèminis ni pilloncu, s’àfabica e sa tomata sicada.

Faeus coi sa bànnia a fogu bàsciu e no dda faeus callai tropu.

Aciungeus sa sali chi abisòngiat.

- Segaus su pani a fitas. Chi su pani est friscu ddu poneus ponni in su forru, a primu de ddu segai a fitas.

Poneus is fitas de pani in d-una cardiga po ddas fai abruschiai e a pustis ddas poneus a amoddiai in su lati callenti. Una borta amoddiadas, ddas feus stiddiai.

- Pigaus unu tianu de coi in su forru, feus un’arrasu de fitas de pani, nci ghetaus a pitzus unu pagu de casu tratau e unu pagu de bànnia. Torraus a fai un’àteru arrasu de pani, de casu e de bànnia, e sigheus aici fintzas a preni su tianu.

Poneus su tianu in su forru, prus o mancu po unu cuartu de ora a temperadura mediana.

 

Su sirboni aresti:

Su chi serbit (po ses personis):

  • 1 chillu de prupa de sirboni
  • 3 tìtulas de allu
  • unus cantu de follas de perdusèmini
  • su scroxu de un’aràngiu
  • 1 decìlitru de ollu ermanu
  • 1 cibudda
  • 1 litru de binu biancu
  • 2 tassas de axedu
  • 1 tassa de filu de ferru
  • sali e pibireddu

Aprontai sa pitantza:

- Poneus sa prupa de su sirboni in àcua frida e axedu po ddi fai perdi su sabori aresti.

- Faeus buddiri sa petza po cuìndixi minudus in àcua salia, boghendindi fatu fatu sa spuma, a s’acabu bogaus sa petza de s’àcua e dda lassaus sfridai.

- Segaus sa petza a dadus. Poneus is arrogus de petza e sa cibudda trisinada in d-unu tianu cun ollu callenti e ddu faeus arrubiai. Ghetaus unu pagu de sali e de pibireddu.

Candu is arrogus de sa petza e de sa cibudda si funt arrubiaus beni, aciungeus su binu e ddu lassaus buddiri a fogu bàsciu fintzas a ddu fai callai. A pustis aciungeus s’allu e su perdusèmini trisinaus, su scroxu de un’aràngiu segaus a fitixeddas, su filu de ferru.

Studaus su fogu candu su filu de ferru est svaporau totu e serbeus sa petza callenti.

 

Prupu a insalada

Sa primu cosa de pigai in cunsideru candu boleus fai su prupu buddiu est sa de ddu scioberai beni, ca de calidadis de prupu nci nd’at medas.

A su mercau prus che àteru si nd’àgatant de duas calidadis: su prupu a duas carreras e su prupu giudeu.

Su prupu a duas carreras est una calidadi de prupu chi tenit is cambas grussas e cun duas fileras de bentosas, est moddi, est saboriu e est prus fàtzili a ddu coi. Po fai su prupu a insalada custu est su prupu chi depeus scioberai.

S’àtera calidadi de prupu chi eus nau, su giudeu, tenit is cambas finixeddas e cun d-una filera sceti de bentosas, est tostadeddu e corriatzu, no est saboriu meda, e fatu a buddiu no bessit bonu.

Su chi serbit po s’arretzeta (po ses personis):

  • 1 chillu de prupu a duas carreras
  • ollu ermanu
  • 2 o 3 tìtulas de allu
  • unu cantu de follas de perdusèmini
  • axedu biancu (po chini ddu bolit ponni)
  • sali

Aprontai sa pitantza:

- A primu de ddus coi, is prupus bolint smatzaus e sciacuaus. Chi is prupus funt friscus, ddus poneus a buddiri in àcua salia po una pariga de minudus po ddus fai amoddiai. Ddus bogaus de s’àcua, e ddus poneus a buddiri in d-un’àtera pingiada, a fogu artu, po trinta minudus.

Chi is prupus fiant in sa ghiacera, insandus abastat a ddus fai buddiri in d-una pingiada sceti po 30 minudus ca funt giai amoddiaus de sa ghiaciadura.

Studau su fogu, lassaus sfridai in s’àcua. Una borta sfridada s’àcua e bogaus is prupus, ddus segaus a fitixeddas o a tancheddeddus.

Poneus totu in d-unu pratu e cundeus cun ollu, cun allu e perdusèmini trisinaus, e a prexeri poneus axedu. Lassaus arreposai a su mancu po un’ora a primu de papai.

 

Fregula cun còciula

Su chi serbit po s’arritzeta 4 personas:

  • 200 gramus de fregula sarda arridada
  • 1 chillu de còciula
  • ollu ermanu
  • allu e perdusèmini
  • tamata sicada
  • passada de tamata
  • 1 litru de àcua

Aprontai po sa pitantza:

-Comporai 1 chillu de còciula frisca, chi eus a ponni in d-unu tianu, e lassei-ddas po una pariga de oras a amoddiai in s’àcua: de custa manera sa còciula at a bogai a foras totu s’arena.

Scolai-ddas e ponei-ddas in d-unu tianu mannu chi eis a ponni in d-unu forreddu a fogu artziau, aici sa còciula s’at a aberri e at a bogai a foras una cantidadi  de àcua.

Ponei sa prupa de sa còciula in logu diferenti de su croxu.

S’àcua chi sa còciula at bogau colaidda cun d-unu scoladori fini, e poneidda a una parti.

In d-unu àteru tianu, mellus si est de terra, depeus arrubiai s’allu e sa tamata sicada (a arrogheddus) in s’ollu ermanu. S’arrubiamentu depit essi lèbiu meda.

Agoa ghetai in su tianu sa passada de tamata, amesturai po una pariga de bortas, cun d-una cullera de linna, e lassai insaboriai po una pariga de minudus.

Imoi aciungei 1 litru de àcua, e faei buddiri, artziendi sa pampa.

Colai, in s’àcua buddia, sa còciula, cun s’àcua de coidura sua, agoa chi dda eis colada aciungei su perdusèmini amaculau.

Candu torrat a buddiri, ponei sa frègula e acabai de coi. Serbei luegu

 

Gatou

Su chi serbit:

  • 500 gramus de mèndula
  • 500 gramus de tzùcuru
  • 2 limònis
  • ollu

Aprontai sa pitantza:

-Spilleus sa mèndula, dda segaus a fitixeddas e dda faeus a pena a pena arridai.

Dda poneus in d-unu tianu a fogu bàsciu meda, ghetaus su tzùcuru e amesturaus fintzas a candu est totu scallau e dorau.

A custu puntu si ghetant sa mèndula e su croxu tratau de unu limoni.

Amesturaus beni beni totu, e ddu ghetaus in d-unu pranu de màrmuri untu de ollu.

Arrasaus su compostu fintzas a candu arribat a una artaria de prus pagu de unu centimetru.

Cun d-unu corteddu untu de ollu, segaus su pillu de sa forma chi si praxit e ddu bogaus de su màrmuri.

Is arrogheddus ddus depeus ponni in pratus cun folla de limoni chi artzianta su nuscu.

 

Pabassinas

Su chi serbit:

  • 200 gramus de pabassa
  • 200 gramus de nuxi
  • 200 gramus de mèndula
  • 50 gramus de farra
  • 1 croxu de aràngiu
  • pisu de matafalua
  • nuxi nuscada
  • saba
  • tragera.

Amesturaus beni in d-una scivedda sa farra, sa pabassa, sa nuxi amaculada, sa mèndula segada a fini, su scroxu de s’aràngiu tratau, su pisu de matafalua arridau e mòlliu, sa nuxi muscada tratada.

Po urtimu cosa aciungeus sa saba, cun su compostu chi eus otènniu faeus a manu conus piticus chi bolint postus in su forru a calori arregulau.

A coidura fata, e duncas agoa de unus dexi minudus, innantis chi is drucis si sfridint, ddus pintaus cun àtera saba e ddus depeus mudai cun sa tragera.

 

Pàrdulas

Su chi serbit:

  • 500 gramus de arrescotu
  • 2 ous
  • unu limoni
  • un’aràngiu
  • 2 culleras de sìmbula fini
  • 2 culleras de tzùcuru
  • tzaferanu
  • 200 gramus de sìmbula fini po sa pasta
  • 30 gramus de ollu de procu
  • sali

Amesturaus beni s’arrescotu cun su croxu tratau de su limoni e de s’aràngiu, is ous, su tzaferanu, is duas culleras de sìmbula e su tzùcuru.

Suexeus in d-un’àteru logu sa sìmbula fini e s’ollu de procu e traballaus totu aciungendi sa cantidadi chi serbit de àcua pagu pagu salia.

Candu sa pasta est traballada beni ndi tiraus pillus finis de innui ndi oteneus discus cun diametru de unus 10 centìmetrus.

Poneus una cullerada de su primu impastu a su centru de dònnia discu e ndi pesaus s’oru de foras pitziendiddu a ingìriu in cuàteru o cincu puntus aici de fai una spètzia de scarteddu.

Is drucis bolint postus in turteras spainadas de farra e ddus poneus in su forru a calori arregulau.

Candu funt cotus ddus umidaus cun àcua in su de susu e ddus spainaus de tzùcuru a pruini.

 

Pirichitus

Su chi serbit:

  • 200 gramus de farra
  • 6 ous
  • una tassa de ollu
  • 400 gramus de tzùcuru po sa capa

In d-una scivedda bolint sbàtius cincu ous e aciungeus sa farra e s’ollu.

Traballaus beni beni fintzas a otenni una pasta lisa e moddi, a innui aciungeus s’ou chi est abarrau.

Cun is manus brutas de farra pigaus arrogheddus de pasta e si ndi faint fustixeddus de segai a arrogus o bocixeddas.

Custus bolint postus, cun d-una tzertu stèsiu intra de issus, in d-una turtera anca eus postu farra innantis.

Sa turtera bolit posta in forru a calori arregulau, aici chi sa pasta cotzat a intru puru.

In su mentras aprontaus sa capa.

Ghetaus in d-unu tianu de terra una tassa de àcua, aciungeus su tzùcuru e su scroxu tratau de su limoni.

Su tianu ddu lassaus in su fogu fintzas a candu si format unu sceropu no lìcuidu meda.

In custu nci afundaus is pirichitus e ddus furriaus a lestru a manera chi aciupint su druci de su tzùcuru.

A s’acabu ghetaus totu in d-unu pranu de màrmuri e a manu ndi bogaus is drucis.

Agoa ddus poneus in d-unu pratu po sfridai.

Est unu druci chi fait a allogai po meda tempus.

 

Is Sebadas

Su chi serbit po 10-12 personis:

  • 1 chillu de casu de brebei (o amesturau) friscu
  • mesu chillu de sìmbula fini de framentu tostau
  • 3 ous
  • calincuna cullera de ollu ‘e procu friscu
  • su scroxu tratau de 2 aràngius
  • ollu ermanu
  • pagu sali
  • su suci de unu limoni
  • tzùcuru o meli

Descridura:

Su casu depit essi friscu a marolla (de 4 o 5 diis) e grassu meda: po ddu fai abarrai ancora prus moddi ddu podeus aciuvai po unus 10 minudus in s’àcua buddia. Bolit duncas sprèmiu e ddu faeus stiddiai.

Suexeus sa sìmbula cun is ous, unu pagu de sali callau in d-una cullera de àcua e s’ollu de procu.

Traballaus beni sa pasta fintzas a dda fai bessiri moddi e dda lassaus arreposai.

In su mentras amaculaus su casu e ddu suexeus cun su scroxu de su limoni tratau.

A custu puntu torraus a pigai sa pasta e cumentzaus a dda tirai, aici de otenni unu pillu fini chi segaus in meda discus, imperendu una arrodedda.

Poneus in d-unu discu una cantidadi bona de s’impastu de casu e poneus a suba de pari unu àteru discu de pasta, serrendi beni is orus.

Sigheus su prenimentu e sa serradura de totus is discus.

Is sebadas funt prontas.

A s’acabu ddas depeus friri cun meda ollu callenti meda, po unu minudu: fintzas a candu is sebadas no si dorant.

Bolint papadas callentis, e spainadas de tzùcuru o de meli.

 

Truta sarda de arrescotu

Su chi serbit:

  • 300 gramus de farra
  • 300 gramus de arrescotu sardu de brebei
  • 300 gramus de tzùcuru
  • 6 ous
  • 1 bussixedda de framentu
  • 1 bussixedda de tzaferanu
  • 1 limoni o aràngiu
  • mesu tassixedda de acuadrenti
  • 1 bussixedda de vanillina
  • mesu tassa de lati
  • tzùcuru a pruini
  • 1 bussidedda de tzùcuru vanillau
  • butirru e farra po sa turtera

Traballaus in d-una scivedda manna e cun su sbatitori elètrigu s’arrescotu, su tzùcuru e su tzaferanu; candu su cumpostu arribat a essi cumpatu e chena de grumus, aciungeus is arrùbius de is ous e traballaus a spuma.

Agoa uneus a pagu a pagu sa farra, lassendidda arrui a proidura cun d-unu sedatzu. Aciungeus su scroxu tratau e su suci de su limoni e de s’aràngiu, sa vanillina e po ùrtimu s’acuadrenti.

In su mentras, ghetaus su framentu in mesu tassa de lati, e ddu fadeus callai unendi-ddu beni a su compostu.

In logu diferenti, montaus a nii is arbus de is ous imperendi una cullera de linna, ddus amesturaus cun delicadesa a su cumpostu principali.

Ghetaus totu in d-una trutera imbutirrada e cun pagu pagu farra. Inforraus a temperadura arregulada (180° gradus) e coeus po unus coranta minudus.

 

Sa Tratalia

Su chi serbit:

  • partis de crabitu o de angioni: figau, prumoni, coru, spreni, stintirigu, lardu.

Serbit unu schidoni, unu arrustidori e unu fogu a s’abertu.

Aprontai sa pitantza:

Segaus is stintìrigus a arroghededdus, ddus poneus in su schidoni cun lardu a fitixeddas. Est a nai lardu, prumoni, lardu, figau, lardu coru, lardu, spreni fintzas a candu acabant is arroghededdus.

Coidura:

Faeus girai totu abellu in su fogu, coeus po unus 45 minudus, e aciungeus su sali. A coidura fata aciungeus àteru sali e bona papada callenti.

 

Porceddu arrustiu

Su porceddu est oramai sa bandera de sa coxina sarda in su mundu.

Premissa:

Su porceddu de lati no est simpli de agatai e bolit coxinau a s’abertu e a schidoni, chi domus de tzitadi no sempri permitint.

Su chi serbit:

  • Unu porceddu, chena de matzàmini e chena de tzuddas (bolint abruxadas).

S’animali mortu, bolit aprontau beni faendi scolai su sànguini e bolit sperrau, e is duas perras bolint postas in su schidoni longu.

Preparatzioni:

In su mentras preparai su fogu, a pustis po su schidoni unu arrustidori automàtigu.

Sa petza bolit posta a unus cincuanta centìmetrus, a s’incomentzu de sa parti de sa brenti chena de incarrerai s’arrodiadura.

Candu at a essi dorau ddu faeus cumentzai a girai, faendi atentzioni a firmai s’arrustidori, cuncentrendi sa coidura po is partis prus prenas.

Agoa tocat a aciungi sali e po chini bolit lardu puru.

Acabada sa coidura, su porceddu bolit postu in d-una safata cun murta, e innoi bolit lassau diaici po 5/10 minudus.

Unu acumpangiamentu bonu po papai su porceddu arrustiu est su binu nieddu (Cannonau).

 

Tàculas

Su chi serbit:

  • 8 trudus o meurras
  • arrampus de murta frisca
  • sali in abundàntzia

Si spìnniant e si abruxant cun delicadesa is pilloneddus chena de ndi bogai su matzàminis.

Agoa bolint postus in d-una pingiada cun àcua e arrampixeddus de murta.

Candu funt cotus si scolant e si spàinat sali in abundàntzia.

A s’acabu is pilloneddus si cumponint a matzus, faendi intrai sa arrimpixeddu de murta in sa conchixedda.

8 pilloneddus faint sa Tàcula.

Innantis de ddus papai tocat a fai passai calincuna ora po aciupai su fragu.

De custus pilloneddus si papat totu , boghendindi su bicu e su stòmogu.