Comunu de Pramantellu Ofìtziu de sa Lìngua Sarda

:: Stòria de sa lìngua

 

Sa lìngua sarda nascit, comenti is àteras lìnguas neolatinas, de sa evolutzioni de su latinu chi ddu ant betiu a Sardìnnia is Arromanus a cumentzai de su su de III sèculus a.C.

Cun sa crisi de s’imperu, sa Sardìnnia ndi arruit asuta de su poderi de is vàndalus e agoa dda cunchistant de is sordaus gregus de s’imperu bisantinu, ma oramai su latinu fiat spainau in totu s’ìsula e fiat abarrau su prus naturali de importu de sa sua costitutzioni linguìstica.

Po is studiosus de sa latinidadi e de is lìnguas arromanzas su sardu est arrennèsciu a si cunchistai unu logu spetziali cumenti genia de lìngua, chi mancai su mudamentu andendi in su tempu, est abarrau acanta meda de is formas de su latinu de cumentzu.

A pustis, po efetu de gentis diferentis chi arribànt a s’ìsula finsas a is diis de oi, sa lìngua nadia pigat is influèntzias, de mesura diseguali, a su cunditzionamentu de medas lìnguas stràngias chi ndi mudant e arricant innanti de totu su fueddàriu.

A su cumentzu de is annus setanta, innantis de s’arriscu chi su sardu podiat essi abandonau cun sa cunsighentzia de sa sperdidura sua, nascint movimentus popularis po sa tutoria e defensa sua.

 

Stòria de is stùdius, su cumentzu de is studius linguìsticus sardus

Sa stòria de sa linguìstica sarda est antiga meda.

Intra de is cabudianus fait a arremonai Sigismondo Arquer chi in su 1550 scriit s’òbera “Sardiniae brevis historia e descriptio”

De importàntzia manna po sa connoscèntzia de sa lìngua sarda est s’òbera de Max Leopold Wagner, su studiosu stravanau tedescu  chi est nàsciu in Mònacu de Baviera in su 1880 e est mortu in Washington in su 1962.

Sa prus òbera de importu de su linguista tedescu Max Leopold Wagner est su “Dizionario Etimologico Sardo” (DES), in tres bolùminis, chi est una lista de totu is fueddus sardus de unu tzertu interessu, chi su grandu e famau studiosu ponit a cumparàntzia po ndi scudrinniai su nascimentu e su chi issus bolint nai.

 

Su sardu lìngua arromanza

Su sardu est una lìngua “arromanza” o “neolatina”, est a nai unu poderi (apoderamentu-dominio) linguìsticu chi ndi benit de sa lìngua chi chistionànt is arromanus antigus.

Diaici funt puru su portoghesu, su spanniolu, su cadalanu, su frantzesu, s’italianu, su ladinu, su furlanu e s’arrumenu.

Naraus arromanzas is lìnguas chi ndi benint de is formas diferentis, innanti de totu chistionadas, chi at pigau su latinu volgari  a intru de is làcanas de s’imperu Arromanu.

Sa parti de sa gramàtica chi stùdiat sa forma de is fueddus dda naraus morfologia.

Est prus de totu in custu sartu chi su sardu ndi allogat su arrastu craru craru de sa lìngua arromanza, chi amostat meda naturalis, chi segundu su parri de is studiosus, ddu torrant a portai a una latinidadi de tipu arcàicu.

 

Su Sardu

In Sardìnnia, lìngua e sartu no andant impari: in prus a “su sardu” s’agatant medas àteras bariedadis e fueddadas no sardas, comenti su cadalanu de S’Alighera, su gadduresu e su tataresu (chi funt cunsideras bariedadis-ponti cun su corsicanu) e su tabarchinu, chi est unu dialetu genovesu chi ddu chistionant in Carloforte is eredeus de is colonus lìguris chi ndi benint de penìsula de Tabarca (Tunisia).

Aìnturu de sa lìngua sarda fait a distinghi medas bariedadis e pronùntzias chi is linguistas e is stòricus de is fenòmenus linguìsticus circant de ponni òrdini de diora.

S’ordinamentu printzipali de is linguistas est su de arreconnosci àreas mannas de dialetus, una centru-norti (o logudoresu) e s’àtera meridionali (o campidanesu) chi acetotu si spartzint in medas àreas prus piticas  (comenti sa brabaxina e sa arborensi).

Po beridadi dònnia bidda chistionat sa bariedadi locali sua.

De diora polìticus e studiosus circant acòrdius po stabilessi cali siat sa forma scrita ofitziali po su sardu.

Est de pagus tempus a oi sa proposta de s’arregioni po una limba sarda comuna, chi perou est agatendi barrancus.

 

Arrègulas sardas

Is leis arregionalis

S’Arregioni Autònoma de Sardìnnia at aprovau una lei po sa cultura in Sardìnnia amparat sa lìngua sarda.

Est a nai  sa lei de su 15 de su mesi de ladàmini de su 1997, sa n. 26: “Promotzioni e abaloramentu de sa cultura e de sa lìngua de sa Sardìnnia”.

Ainas giurìdicas po promuovi sa lìngua sarda.

Oi po amparai sa lìngua sarda imperaus sa lei de su Stadu 482/99, chi si ocupat prus de totu de sa aministratzioni pùbrica, e sa lei Arregionali 26, chi intamis si ocupat innanti de totu de is progetus culturalis.

Progetus po s’imparu in sa scola

Fait a fai progetus sperimentalis de imparu po sa scola in lìngua  sarda (o àteras lìnguas o dialetus de Sardìnnia) siat pighendi dinai de sa lei arregionali 26/97 chi de sa lei stadali 482/99.

 

Progetus po sa comunicatzioni

S’artìculu 14 de sa lei arregionali 26/97 finàntziat progetus de comunicatzioni in is mass-media chi imperant su sardu.

Innantis de totu s’Arregioni pigat parti donendi dinai po produsi e spainai programas arradiufònicus e po sa televisioni.

 

Progetus po sa aministratzioni pùblica

A cumentzu de s’annu 2002 eus biu in s’ìsula unu froressi de su fenomenu de s’abertura de is chi nant ofìtzius linguìsticus chi in sardu ddus ant nomenaus comenti “Ofìtzius de sa lìngua sarda”.

 

Progetus culturalis

Sa lei arregionali 26/97 si ocupat prus de totu de is abetus curturalis po spainai sa cultura e sa lìngua sarda.

In custu sensu ant circau de intervenni a favori de entis localis, universidadis, assòtzius e puru studiosus.